நான் விரும்பும் பெண்கள்

அம்மா

எமக்காகத் -தன்

மெய் வருத்தி

உழைத்துக் களைத்துப்போன

உன்னத தெய்வம்.

இன்னும்...

ஓயாது சுழல்கிறாள்

தன்னச்சில்.

மனைவி

என்னையே உலகமென

நம்பி வந்த உத்தமி.

எனக்குள் ஒளிந்திருந்த - ஓர்

எழுத்தாளனை இனங்காட்டிய

என்

காதல் தேவதை.

மகள்

மழலைச் சிரிப்பில் என்னை

மயங்கச் செய்தவள்.

"அப்பா" என்ற

ஒற்றைச் சொல் மந்திரத்தால்

என்னைக் கட்டிப் போட்ட

வித்தைக்காரி.

அக்கா

அன்னைக்கு நிகரான

இன்னொரு தாய்.

நாவுக்கு ருசியான

உணவுதர இவளுக்கு நிகர்

யாருளரோ இவ்வுலகில்...

தங்கை

சிறுவயதில் என்

விளையாட்டுப் பொம்மை.

மௌனத்தில் கூட

வார்த்தைகள் உண்டென்ற

மொழியின் இலக்கணம்

கற்றுத் தந்தவள் - அவள்

உரத்துப் பேசி

நான் பார்த்ததில்லை.

சித்தி

அடிக்கடி நலம் விசாரிக்கும்

தூரத்துச் சொந்தக்காரி .

பாசத்தால் கட்டிப்போட்ட

என் மூன்றாந்தாய்.

அம்மம்மா

"அந்தக் காலத்தில நாங்கள்"

என்ற வெறுப்பு

வார்த்தையின் சொந்தக்காரி.

அடிக்கடி கோபப்படும்

அதி தீவிர பாசக்காரி.