மெல்லத் தமிழ் இனிச் சாகுமா?

“ உலக மொழிகளின் தாய் மொழியும்

திராவிட நாகரிகத்தின் தொட்டிலில்

ஆட்டி வளர்க்கப்பட்ட குழந்தையுமாகிய

அமிழ்தினும் இனிய மொழியாம்

தமிழ் மொழி இறந்து விட்டாள் என்பதை……”

இப்படியொரு அறிவித்தலை எதிர்பார்த்தபடி நாம் நகர்ந்து கொண்டிருக்கிறோமா என்ற வினாவுடனும் நிகழாது தடுக்கப் பாடுபடவேண்டும் என்ற அவாவுடனும் இதனை எழுதத் தொடங்குகிறேன்.

தமிழ் மொழி

* நம் தாய்மொழி தமிழாகும்.

* உலகின் பன்மொழி ஆய்வாளர்களினால் முதலில் தோன்றியமொழி என்ற சிறப்புப் பெற்ற மொழி.

* அமிழ்தினும் இனியதெனப் புகழப்படுகின்ற மொழி.

* 9 கோடி தமிழர்களின் தனித்துவமான மொழி.

* “யாமறிந்த மொழிகளிலே தமிழ்மொழிபோல் இனிதாவதெங்கும் காணோம்” எனப் பாரதியாரால் போற்றப்பட்ட மொழி.

* கல்வெட்டிலிருந்து கணிணி வரை பரந்த மொழி.

தமிழ் மொழி இதுவரை இழந்தவை

அகத்தியம்

பெருநாரை

பெருங்குருகு

முதுநாரை

முதுகுருகு

பஞ்சமரபு

பஞ்சபாரதீயம்

பதினாறு படலம்

வாய்ப்பியம்

இந்திரகாளியம்

குலோத்துங்கன் இசைநூல்

முதலிய எண்ணற்ற அரிய நூல்களும் கல்வெட்டு முதலிய எண்ணற்ற ஆதாரங்களும்

தமிழ் வாழும் இடங்கள்

தமிழ்நாடு

இலங்கை

சிங்கப்பூர்

மலேசியா

பர்மா

மொரீசியஸ்

தென்னாபிரிக்கா

கயானா

பிஜி

சுரீனாம்

ட்ரிடாட்

டொபாகோ

போன்ற நாடுகளில் பூர்வீகத் தமிழர் உள்ளனர். ஆனால் எல்லா நாட்டிலும் தமிழ் பேசப்படவில்லை.

ஐரோப்பிய நாடுகள்

கனடா

அமெரிக்கா

அவுஸ்ரேலியா

போன்ற நாடுகளில் இலங்கையில் இருந்து புலம்பெயர்ந்து சென்ற தமிழர்கள் அதிகம் வாழ்கின்றனர். இவர்கள் தாம் வாழும் நாடுகளில் தமிழை வளர்க்க ஓரளவு முயற்சி எடுத்து வருகின்ற போதிலும் இளந்தலைமுறையினரான இரண்டாம் சந்ததியினர் தாய்மொழியில் நாட்டமின்றி இருக்கின்றமை வருந்தத் தக்கது.

தமிழுக்குரிய இடம்

* 1996 ஆம் ஆண்டின் புள்ளிவிவரப்படி உலகம் முழுவதிலும் 7 கோடியே 40 இலட்சம் (74 மில்லியன்) மக்கள் பேசும் மொழியாகத் தமிழ் இருந்தது. அப்பட்டியலின்படி தமிழுக்கு உலக மொழிகளில் 20 வது இடம் வழங்கப்பட்டிருந்தது.

* இந்தியாவின் அரசியலமைப்பின் கீழ் அங்கீகரிக்கப்பட்ட 22 மொழிகளுள் தமிழும் ஒன்று.

* தமிழ் நாட்டின் ஆட்சிமொழி.

* இலங்கையிலும் மூன்று ஆட்சி மொழிகளுள் தமிழும் ஒன்று.

* சிங்கப்பூரின் தேசிய மொழிகளுள் ஒன்று.

* தென்னாபிரிக்காவில் தமிழுக்கு அரசியல் அமைப்பு ரீதியான அங்கீகாரம் உள்ளது.

* இந்தியாவில் செம்மொழி அங்கீகாரம் பெற்ற ஒரேயொரு மொழி தமிழ் மட்டுமே. (இந்திய நாடாளுமன்றத்தில் வைத்து 2004 – 06 – 06 அன்று அப்போதைய குடியரசுத் தலைவர் டாக்டர். அப்துல்கலாம் இவ் அறிவிப்பினை வெளியிட்டார்.)

தமிழ் வழக்குமொழி

“Ethnologue” என்ற உலக மொழிகள் பற்றிய பதிப்பு நிறுவனம் தமிழில் 22 வட்டார வழக்குகள் உள்ளதெனக் கூறுகின்றது.

ஆதிதிராவிடர்

ஐயர்

ஐயங்கார்

அரவா

பருகண்டி

கசுவா

கொங்கர்

கொரவா

கொர்சி

மதராஸி

பரிகலா

பாட்டுபாஷை

இலங்கைத் தமிழ்

மலேயா தமிழ்

பர்மா தமிழ்

தென்னாபிரிக்கத் தமிழ்

திகாலு

அரிஜன்

சங்கேதி

கெப்பார்

மதுரை

திருநெல்வேலி

முதலியனவே அவையாகும். ஆனால் ஆராய்ந்து பார்க்குமிடத்து 100க்கு மேற்பட்ட வட்டார மொழிகள் தமிழில் நிலைத்து விட்டமையே உண்மையாகும்.

அழிவை எதிர்நோக்கியபடி தமிழ்மொழி

* பிறமொழி ஊடுருவல் அதிகரித்தமை

* வட்டார வழக்குகள் தனிமொழியாகக் கிளர்வது

* தொடர்ச்சியாக இரண்டு தலைமுறையினர் தமிழைக் கற்க ஆர்வமற்றவர்களாக எதிர்காலத்தில் இருந்தல்

* தமிழ் நாட்டில் பலர் ஆங்கிலத்தில் பேசுவதையே கௌரவம் என எண்ணுதல்

* புலம்பெயர் தமிழர்களிடையே குறிப்பாக இரண்டாம் தலைமுறையினரிடையே தமிழ் பேச்சு மொழி அந்தஸ்தைக் கூட இழந்தமை

* போன்ற பல காரணங்களினால் தமிழ் அழிவை நோக்கி நகரத் தொடங்கிவிட்டதோ என்ற ஐயம் எழுகிறது.

இழிவு நிலை

* தாய்மொழியில் பேசினால் கைதட்டும் கூட்டமாகத் தமிழர் இருப்பது.

* தமிழில் பேசுவதை இழிவெனக் கருதுவது

* “எனக்கு அவ்வளவாகத் தமிழ் வராது” எனக் கூச்சமின்றிச் சபையில் கூறுவதும் அதைப் பெருமையென எண்ணுவதும்.

* இவ்வாறு இன்னும் சொல்லிக்கொண்டே போகலாம்.

நாம் செய்யவேண்டியது என்ன?

* தமிழைத் தமிழாகப் பேச வேண்டும்.

* அறிவியல் மொழியாகத் தமிழை உயர்த்த வழி செய்ய வேண்டும்

* ரைசியன் போல் யப்பான்காரன் போல் சீனக்காரன் போல் சொந்த மொழியில் எதையும் செய்யலாம் என்ற நம்பிக்கை தமிழனுக்கும் பிறக்க வேண்டும்.

* முக்கியமாகத் “தமிழரைக் கண்டாலாவது தமிழில் பேசவேண்டும்”

தமிழின் அழிவு நிச்சயிக்கப்பட்டு விட்டதா?

சில ஆண்டுகளுக்கு முன்னர் ஐ.நா சபையின் அறிக்கையொன்றில் இன்னும் 30 ஆண்டுகளில் அழியப்போகின்ற உலக மொழிகளில் தமிழும் ஒன்றாக உள்ளடக்கப்பட்டிருந்தது. இது சாத்தியமாவதும் அசாத்தியமாவதும் இனமானமுள்ள ஒவ்வொரு தமிழரின் கையிலும் நாவிலும்தான் உள்ளது.