தியாவின் பேனா பேசுகிறது...

காதலி தினம்

2012-02-11T09:08:00.001+05:30

என் காதலுக்கு

உயிரோட்டம் தந்தவளே

ஒற்றை வார்த்தைச்

சொல்லில் கட்டிப் போட்ட

வித்தகியே...

இந்த நாளில்

உன் வாய் திறந்து

நீ உரைத்த

தித்திக்கும் செந்தமிழே

இன்னும் என்

செவியில் உன்

நினைவுகளை மீட்டும்

தாரகை மந்திரமாய்...

ஒவ்வொரு நாளும்

ஒவ்வொரு வழியிலும்

என் சிறந்த தோழியாய்

நீ....

நீ என் இனிப்புப் பெட்டகம்

அன்பான வார்த்தைகளின்

சொந்தக்காரி

கண்களில்

வைரக்கல் பதித்த

காதல் ஓவியம்

நீ உன் செவ்விதழ் என்ற

காதல் ரோஜாவால்

என் இதயத்தில்

பூச்செண்டு முடித்து வைத்தாய்.

உன் மென் விரல்கள்

என்னைத் தொடும் போதெல்லாம்

என் இதயம்

மெல்லிய வெப்பத்தை

உணர்கிறது.

உண்மையில் நீ

என் இரத்த ஓட்டமாக

இருப்பதால் தான்

நான் - நீ -

'நாம்' என்றானோம் போலும்.

நீ என் வாழ்க்கைக்கு

பொருள் கொடுத்திருக்கிறாய்

நானும் பதிலீடாக

என் வாழ்நாள் முழுவதையும்

உனக்கே தந்திருக்கிறேன்

என் இதயம்

கலவரத்தால் நிரப்பப் பட்டபோது

ஒளி நிரப்பி புதுப்பித்தவளே

என் இனிய தோழியே

நம் ஆத்மாவை

ஒன்று சேர்த்து நெருக்கம் தந்த

இறைவனுக்கு நன்றி செய்ய

நாம் இருவரும்

நமக்கு கிடைத்த இரு

செல்வங்களுடன்

என்றும் காதலராக

மகிழ்வுடன் நிறைவாக

வாழ்ந்து காட்டுவோம்.

என் தேவதை

2012-01-20T09:00:00.003+05:30

உன் இருண்ட முடியும்

நீண்ட கூரிய மூக்கும்

என்னைக் குஷிப்படுத்தும்

அழகிய இரு சாதனங்கள்

நான் உனக்கு ஒரு

செவ்விதழ் ரோஜா கொடுத்துப்

பின் ஒரு சிறு

முத்தமிட்ட பின்னர்

உன் காந்தக் கண்கள்

இயக்கம் பெற்றன.

அது அமைதியான

என் மனதில்

ஒரு சலனத்தை

விதைத்துச் சென்றது.

மென்மையான உன் குரலும்

செவ்விதழில் புன்னகையும்

நீண்ட நேரம் நிலைக்கவில்லை

நான் உட்கார்ந்தேன்

உன்னுடன்

நிரந்தர சொல்லாடலுக்காக

அதற்கான முயற்சியில்

தோற்றுப் போய் நான்

மீண்டும் வேதாளமாய் நீ

எட்ட நின்று ஹாய் சொல்லி

பின் ஹலோ சொல்லி

கையசைத்துப் பிரிந்தாய்

அந்த அற்புதக் கனவில்

மிதந்தபடி இன்றும் நான்

நான் வாழ்ந்து கொண்டிருந்தால்.......

2011-11-08T04:01:00.004+05:30

காயம் மற்றும் வலி

இங்கே இருக்கிறது.

அமைதி மற்றும் காதல்

இது அனைத்தும்

இங்கே இருக்கிறது.

குழப்பம் மற்றும் சந்தேகம்

அதுவும் கூடவே வாழ்கிறது.

நாங்கள் இல்லாமல்

நாங்கள் இல்லை.

நாம் அழ அழுகிறோம்.

நாம் முயற்சி செய்து

நாமாகவே சிரிக்கிறோம்.

நாங்களாகவே

காயப்பட்டுக் கொள்கிறோம்.

நாங்களாகவே வலிகளில் இருந்து

மீண்டெழுகிறோம்.

கடைசியாக சோதனை முடிவில்

வாழ்க்கை

ஒரு பாடமாக உள்ளது.

மிகவும் நன்றாக கற்றுக்கொள்ள

என்னுள்

நிறையவே உள்ளது.

ஒருவேளை, ஒரு நாள்,

என் கதை

என்னால் மட்டுமே

எழுதப் படக் கூடியதாக

என் வாழ்க்கை

அர்த்தப் பட்டுபோகலாம்

அப்போதும்

நான்

வாழ்ந்து கொண்டிருந்தால்.......

காதல் எழுதப்படாத விதி...

2011-07-08T02:20:00.004+05:30

ஒரு அமைதியான மாலை நேரம்
நட்சத்திரங்கள்
மற்றும்
மெழுகுவர்த்தி...
அலைகளின் ஒலி
மிகவும் இறுக்கமான
நடைப் பயணம்

நம் நிழல்கள்
மணல் தரையில்
கூடவே...
தீவிரமாக ஒருவருக்கொருவர்
இன்னும்
அதி தீவிரமாக
கைப் பிடித்து
நெருக்கமாக....

நவ நாகரிக உலகத்தில்
காதல் எழுதப்படாத விதி...
காற்று ஊடுருவிய
நெருக்கமான நேரத்தில்
ஒன்றும் ஒப்பிட்டுக்கொள்ள முடியாது

நாம் சந்தித்து வந்ததிலிருந்தே
என்னுடைய எண்ணங்கள்
அவளால் மாற்றம் பெற்றுள்ளன
என் இதயம்
மனம் மற்றும் உடல்
இன்னும்....

நான்
எப்போதும் உன்னுடன்
இருக்க வேண்டும்
நீ
என் வாழ்வின்
ஊற்றாக இருக்கிறாய்
அழகான
மற்றும் விலைமதிப்பற்ற
என் சொத்து நீ...

நீ என் மனைவி

மனம்

2011-06-13T09:07:00.002+05:30

மீண்டும் முன் போல்
முயன்று பார்க்கிறேன்
காற்றைப் பிடித்துக்
கடிவாளம் கட்டியது போல்
தோற்றுப் போகிறது

வாழும் தமிழ்

2011-04-23T18:36:00.002+05:30

இது அமெரிக்காவின் மினேசொட்ட மாநிலத்தில் உள்ள ஒரு நூலகத்தின் வரவேற்பு பதாதை இது. இதில் தமிழ் இடம்பெற்றுள்ளது ஒரு சிறப்பாகும். அதை நீங்களும் பாருங்கள் நட்புகளே.

ஒரு கவிஞனின் உள்ளக் குமுறல் (ஏப்ரல் 13)

2011-04-09T19:27:00.003+05:30

இது எனது 200 வது இடுகை

ஏப்ரல் 13 தமிழரின் ( தமிழ் நாட்டு ) மாற்றத்துக்கான நாள்.
இதோ ஒரு கவிஞனின் உள்ளக் குமுறல் நான் பார்த்ததை உங்களுடன் பகிர்கிறேன்.

.

அப்பாடா

2011-04-08T19:36:00.002+05:30

அமெரிக்காவில் கடந்த ஒரு மாதமாக இந்தியர்கள் மத்தியில் ஒருவித துடுப்பாட்ட காய்ச்சல் நிலவி அது முடிவுக்கும் வந்து விட்டது. அதிகமாக தெலுகர்களும் இந்தியத் தமிழர்களும் வாழும் "மினிசொட்டா" என்ற மாநிலத்தில் தினமும் இந்தியர்கள் அதிகம் பேரைச் சந்திக்கும் வாய்ப்பு எனக்கு இப்போதும் உண்டு. நான் கண்டு மனம் மகிழ்ந்த ( கசந்த ) அனுபவங்கள் இதோ சில....

அமெரிக்கர்கள் இங்கு நிற இன பாகுபாடு பார்ப்பதில்லை.

தமிழர்கள் அதிகமாக ஆங்கிலம் பேசுகிறார்கள்

தெலுகர்கள் தாய்மொழியில் பேசுகிறார்கள் ( எம்மிடம் கூட தெலுகு தெரியுமா? என கேட்கிறார்கள்.

அதிகமான அமெரிக்கர்கள் ஹிந்தி மட்டுமே இந்திய மொழி என நினைக்கிறார்கள்.

ஆனால்....

இங்கு ஒரு நூலகத்தில் ஐம்பதுக்கு மேற்பட்ட மொழிகளில் வரவேற்பு பலகை போடப்பட்டிருந்தது. அதில் தமிழும் ஒரு மொழி. அதில் சிங்களம் இடம் பெறவில்லை. அது மகிழ்ச்சி.

இருநூறாவது
பதிவில் சந்திப்போம்...

ஐந்தாண்டு கடந்தாலும்...

2011-03-14T09:53:00.003+05:30

என் தேவதையே

உன்னை நான்

நேசிக்கிறேன்

என்று சொன்னால்

நீ கோபிப்பாய்

அதனால்

இன்னும் சொல்கிறேன்

நான் உன்னையே

சுவாசிக்கிறேன்...

என்னவளே - உன்

கரம் பிடித்து இன்று

ஐந்தாண்டு கடந்தாலும்

நேற்றுப் போல்

இனிக்கிறதடி இன்றும்

வாழ்க்கை...

மறுபடியும் மறுபடியும்

2011-02-28T10:20:00.000+05:30

தொலைந்து போன

புன்னகையினைத் தேடியும்

அது கிடைக்காமல்

வலிந்து வரவழைத்த

புன்னகையுடன்

கை கோர்த்து

வாழ நினைக்கிறேன்..

முடியாமல் போக

மறுபடியும் மறுபடியும்

பழமை மட்டுமே

ஆழப் பதிகிறது(படிக்கிறது)

என் உள் மனதில்...

அமெரிக்காவின் பனிபொழியும் எழில்மிகு மாநிலமாம் மினிசோட்டாவில் இருந்து...

2011-01-04T22:37:00.003+05:30

வணக்கம் நண்பர்களே எல்லோரும் நலம்தானே....

நான் தியா....

அமெரிக்காவின் பனிபொழியும் எழில்மிகு மாநிலமாம் மினிசோட்டாவில் இருந்து எழுதுகிறேன். இன்றுடன் நான் இங்கு வந்து ஒரு மாசம் ஆகப்போகிறது. இணைய வசதிகள் இல்லாமையால் உங்களுடன் இணைய முடியாமல் கவலையில் மூழ்கியிருந்தேன்.

அதைவிட வந்தவுடன் வேலையில் இணையவேண்டிய அவசியமும்..... அதனால் நட்புகளாகிய உங்களுடன் இணைவதற்கு போதிய அவகாசம் கிடைக்கவில்லை.

குறிப்பாக பல நண்பர்கள் நலம் விசாரித்து மற்றும் தேடியும் இருந்தீர்கள் உங்கள் அனைவருக்கும் நன்றி.

இனி இணையம் சீரானதும் உங்களுடன் முன் போல இணைந்திருப்பேன்.

நன்றி

என்றும் அன்புடன்....

தியா

என் பழைய நாட்குறிப்பில் இருந்து ஒரு பகுதி

2010-10-19T15:43:00.006+05:30

நாள்:- 14 .10 .2000

உன் பேச்சு

என் நெஞ்சில்

தேன் வார்க்கும்

உன் மூச்சு

உள் மனதைத்

தாலாட்டும்

நாள்:- 15 .10 .2000

என் கண்ணும்

உன் கண்ணும்

சங்கமிக்கும்

அந்தச் சங்கமத்தில்

இருவருக்கும்

சுகம் பிறக்கும்

நாள்:- 16 .10 .2000

உன் மனமும்

என் மனமும்

கவி வடிக்கும்

உன் மௌன மொழிக்

கூட்டினுள்ளே

காதல் பிறக்கும்

நாள்:- 17 .10 .2000

உன் செவ்விதழில்

பல்வரிசை

பேச்சுரைக்கும்

அந்தப் பேச்சினிலே

என் நெஞ்சில்

தேன் சுரக்கும்

நாள்:- 18 .10 .2000

நீளும் நாட்களிலே

நீதான்

என் உயிர் மூச்சு

வீசும் காற்றினிலும்

மெதுவாய்

உன் சலனம்

நாள்:- 19 .10 .2000

என் இதயத்துள்

புகுந்து

கொடி நாட்டினாய்

உன் வெட்கத்தால்

என்மேல்

வலை வீசினாய்

தேடுகிறேன்...

2010-10-18T15:34:00.004+05:30

கொடிய

இருளில்

கைவிடப் பட்ட

ஆத்மாவாய்

காற்றில்

என்

புன்னகையை

விட்டெறிந்து விட்டு

கை

நனைப்பதர்க்காய்

நீர்

தேடுகிறேன்

சுடுகாடாகிப்போன

என்

கிராமத்தில்

அனைவரும் வருக

2010-10-14T10:09:00.007+05:30

நாளை வெள்ளிக்கிழமை ( 15 /10 /2010 )
மித்ர நிறுவனம் நடாத்தும்
"நூல் அரங்கேறும் மாலை"
நிகழ்வு :- சென்னை எழும்பூரில் உள்ள கன்னிமரா நூலகத்தின் அண்ணா சிற்றரங்கில் நடைபெற உள்ளது.

நூலாசிரியர் - வி.டில்லிபாபு ( DRDO விஞ்ஞானி )
நூல் - "ஒரு செல் உயிரிகள்"

அனைவரும் வாரீர்
நன்றி

-தியா-
( மித்ர ஆர்ட்ஸ் அண்ட் கிரியேஷன் )
கோடம்பாக்கம்

இது இப்போது பிசாசுகளின் காலம்

2010-10-11T12:46:00.005+05:30

பழைய கவிதைப்

புத்தகங்களைப்

பரப்பியபடி

படுத்துறங்கும்

பிசாசுகள்...

இருளில் இருந்து

மீள மறுத்து

முட்டி மோதுகிறது

இடர்

சமர் நடந்த தேசத்தின்

சிதைவுகளில் இருந்து

மீளமுடியாமல்

திண்டாடுகிறது

கந்தக வாடை

நியூட்டனின்

மூன்றாம் விதியை

நிலத்துக்கும்

வானுக்கும்

கற்பிதம் செய்யும்

ராணுவ முலாம்

பூசப்பட்ட

போதி மரங்கள்

திணிக்கப் படுவதற்காய்

இலவசமாக்கப்பட்ட

நிர்வாண பௌத்தம்

கக்கிய கட்டிடங்கள்

எம் மண்ணில்

இருளும் நானும்

2010-10-07T10:41:00.006+05:30

இயலாமைகளுக்குள்

வாழ்ந்து

பழக்கப் பட்டவன் நான்

மீண்டும் மீண்டும்

குழி தோண்டிப்

புதைத்துவிட

முயல்கிறேன்

என் இயலாமைகளை

என்னையும் மீறி

அது வீறுகொண்டு

என்னை அடக்கியாள

நினைக்கிறது...

பெரும் இறுமாப்புடன்

கடிவாளம் பூட்டிய

குதிரையாக

என்னைக் கட்டியாள

நினைக்கிறது

உருவமில்லாத

அந்த மர்மம்...

ஆனாலும்

இயலாமைகளுக்குள்

வாழ்ந்து

பழக்கப் பட்டவன்

நான்

காதலியின் விசித்திர ரசனை

2010-10-06T16:45:00.005+05:30

என்
அன்புக்கினிய
நெஞ்சே...
என் பொய்க்
கோபம் கண்டு
என்னவர் அடைகின்ற
துன்பத்தை
சிறிது நான்
ரசிக்கவேனும்....
என் கைகளுக்கு
உத்தரவிடு
என்னவரை
ஒரு கணமேனும்
கட்டித் தழுவாமல் இருக்க....

புல்லாது இரா அப் புலத்தை அவர் உறும்
அல்லல் நோய் காண்கம் சிறிது
திருக்குறள் - 1301

இனிய பிறந்தநாள் வாழ்த்துகள்

2010-09-22T22:47:00.008+05:30

இங்கும் சென்று வாழ்த்துங்கள் ...... (மழைச்சாரல் - நிகே-)

இனிய பிறந்தநாள் வாழ்த்துகள்
காண்டீபன் சாந்திநிகேதா 01-10-2010 அன்று சென்னையில் தனது 31 வது பிறந்தநாளைக் கொண்டாடுகிறார்.

காண்டீபன் அக்ஷிகா 01-10-2010 அன்று சென்னையில் தனது 3 வது பிறந்தநாளைக் கொண்டாடுகிறார்.

இன்று என் வீட்டுக்குள்
மூன்றாம் பிறையும்
முழு நிலவும்
ஒன்றாகக் குடி கொண்டு
வாழ்த்த வந்த நன்நாள்....

வருடத்தில் வருகின்ற
நாட்களில் எல்லாம்
வசந்தத்தைத் தருகின்ற
பொன் நாள் இது.....

செப்ரெம்பர் இறுதி நாளின்
இரவு மட்டும் நீள்வது ஏனோ?
ஒக்டோபர் ஒன்று வந்தால்
இரட்டிப்பு மகிழ்ச்சி என் வீட்டில்...

என் காதல் தேசத்து
புன்னகையே
எங்கள் வீட்டின்
முழு நிலவே
உனக்கு இன்று
பிறந்தநாள் என்று
காலையில் இருந்தே
பூப் பறிக்கிறேன்
அர்ச்சிப்பதற்காக....

உன் பிறந்தநாள் பரிசாக
கடவுள் தந்த
எங்கள் அன்புச்
செல்வத்துக்கும் உனக்கும்
ஒரே நாளில்
விழா எடுக்கப் பிறந்த
அதிஷ்டக்காரன்
நான் என்பதால்
ஒரு கர்வம் எனக்குள்...

என்ன ஒரு வித்தியாசம்
உனக்கு முப்பத்தொன்று
மகளுக்கு மூன்று

என் அன்பு மனைவியே
பத்தாண்டுகளுக்கு முன்
உன்னைச் சந்தித்து
நான் சொன்ன
அதே மகிழ்வுடன்
அதே புன்னகையுடன்
இன்றும் சொல்கிறேன்
என்றும் மகிழ்ந்திருப்போம்
நிறைவாக...

எங்கள் வீட்டு
வளர் பிறையே
இன்றுடன்
அகவை மூன்றில்
கால் பதிக்கும்
கற்கண்டே...
கரும்பே...
உன் தாய்க்கு
இறைவன் தந்த
பிறந்தநாள் பரிசே
எங்கள் வாழ்வில்
ஒளியேற்றி
முழுமை தர
வந்த முத்தே
கலைகள் பல பெற்று
துறைகள் பல கண்டு
நிதம் வாழ்வில்
மகிழ்ச்சியுடன்
என்றும் வாழ்க
நீ பல்லாண்டு
நலமுடனே.....

இனிதே வாழ்த்துகிறேன். இரா. காண்டீபன் ( கணவன் - அப்பா )
-தியா -

அன்பே என் உயிரே...

2010-09-18T14:47:00.008+05:30

அன்பே - என்

உயிர்க் காதலனே

உன்னை மட்டும்

நிறைத்து

என் நெஞ்சு மகிழ்கிறது.....

என் உயிரே

உன்னை - என்

நெஞ்சில் நான் சுமப்பதால்

சூடாக உண்ண - குடிக்க

மறுக்கிறது என் இதயம்

நீயோ

வெப்பம் தாங்க மாட்டாய்

என்பதை

என்னைவிட - என்

இதயம் அறியுமோ !!!

"நெஞ்சத்தார் காதலவராக வெய்து உண்டல்
அஞ்சுதும் வேபாக்கு அறிந்து"
- திருக்குறள் 1128 -

பிள்ளையாரின் கவலை....

2010-09-10T13:53:00.004+05:30

பிள்ளையாரின் கவலை

பிறந்த அன்றே
தூக்கிக் கடலில்
போடுகிறீர்களே
பாவிகளே - நான்
என்ன பாவம் செய்தேன்...

பக்தனின் கவலை

விக்கினம் தீர்க்கும்
விநாயகனே - உன்னை
கடலில் கரைக்கும் வரை
நான் படும்
விக்கினங்களைத்
தீர்த்தருள்வாயாக......

தடுமாறும் இதயம்

2010-09-06T15:49:00.005+05:30

அழகு தேவதையே

காதில் தொங்கும் உன்

காதணிகளின் சுமையை

தூக்கி நடப்பது

அழகோ அழகு

அதுசரி பெண்ணே

நீ

தெய்வ மங்கையா?

அல்லது அழகிய மயிலா?

அதுவுமில்லையேனில்

மானிடப் பெண்ணா?

உன்னை

யாரென்று

சொல்ல முடியாதபடி

தடுமாறுகிறது

என் நெஞ்சம்.

"அணங்கு கொல்ஆய்மயில் கொல்லோ கனங்குழை
மாதர் மாளும் என் நெஞ்சு"

-திருக்குறள்-

இந்த இடுகையை முடிந்தவரை நீங்களும் இடுங்கள்

2010-09-03T10:46:00.006+05:30

இந்த இடுகையில் ஏற்பட்ட தவறுக்கு வருந்துகிறேன்.

நன்றி

அன்புடன்...

-தியா-

பசுமை நிறைந்த நினைவுகளே...

2010-08-28T14:47:00.009+05:30

ஒளிக் கதிர்கள் தெளிவற்ற

மாலை நேரத்துச் சூரியனோடு

கைகோர்த்தபடி

என் புழுதித் தெருவில்

இறங்கி நடக்கிறேன்

வெற்றுக் கால்களோடு….

நீண்ட நெருமுனை…

வளைவில்

முந்திச் சென்றான்

என் பால்ய கால நண்பன்...

அவன் இப்போது உயிருடன் இல்லை...

சுற்றிவளைக்கப்பட்ட

சிறு பகுதியில் இருந்து

தப்பிப் பிளைத்து தடுமாறி

வரும்போது

ஆமி அடித்த செல்லில்

உயிர்விட்டானாம்

என்று

சொல்லக் கேள்வி....

அவனும் நானும் கூடி

வயல் விதைப்போம்

பள்ளி செல்வோம்

பந்தடிப்போம்

மாடு மேய்ப்போம்

குளத்து வானில்

குளித்து மகிழ்வோம்.....

அது அந்தக் காலம்

இப்போது

நான்

முழுவதுமாக மாறிவிட்டதாக

எல்லோரும் சொல்கிறார்கள்

நான் யாருடனும்

பேசுவதில்லையாம்

சிரிப்பதில்லையாம்...

பைத்தியம் என்றும் சிலர்

பழியுரைக்கிறார்கள்....

பாவம் அவர்கள்.....

அவர்களுக்குத் தெரியாது

நான் இப்போதும்

என் உறவுகளுடன்

நண்பர்களுடன்

கனவில் அடிக்கடி

சிரித்துப் பேசுவது......

உன் கையின் மகத்துவம்

2010-08-24T16:08:00.002+05:30

பல முறை

எழுத்துக் கிழித்துப் போட்ட

என்

கவிதைத் தாள்கள்

அனைத்தையும்

நீ

குப்பை என்று

அள்ளிய போதுதான்

அவை

கவிதை என்ற

உண்மை புரிந்தது.

மரித்துப்போன ஆன்மாக்களின் சாட்சியாக...

2010-08-21T21:59:00.005+05:30

ஊன்றுகோல் பிடிச்சு

நடக்கிறாள்

அவள் ஒரு குழந்தை.

தந்தையைப் பறிகொடுத்து

வருஷம் ஒன்று

ஓடிப் போச்சு.

குடியிருந்த வீட்டில்

எதுவும் மிச்சமில்லை.

எதைஎதையோ தின்று

நாய் மட்டும்

எலும்பும் தோலுமாக

தெருவில் திரிகிறது

கூடிக் குலாவிய

எங்களின் மண்ணில்

ரத்த ஆறு ஓடிய

சுவடுகளாக

இன்றும் தெருக்களில்

நம் உறவுகள்.

முகமிழந்த மனிதர்களாக

புலத்திலே

நாங்கள் இங்கே.

அன்பாய் விசமூற்றும்

சிறு பரீட்சையில்

சில விசமிகள்

எழுத்துலக கோலேந்தியோர்

நாமம் சூட்டி

கூடப் போகிறார்களாம்.

ரத்தவாடை நீங்காத

சிறு தீவைப்

பன்னீர் தெளித்து

புனிதமாக்கப் போகிறார்களாம் ... !!! ???

இயலாமைகள்

2010-06-02T22:40:00.004+05:30

நடை பாதையை மறித்து
மூக்கை நீட்டும்
கடைகளின் முன் கூடாரங்கள்....

வீதிக் கடவைகளில்
நடக்கும் போது குறுக்கறுக்கும்
விரைவுந்துகள்....

பேருந்தில் மூச்சடக்கி
கால்வைக்க இடம் தேடும் நான்...

மல்லுக்கட்டி நடத்துனர் மீது
சண்டை போடும்
ஒரு கூட்டம்....

மாற்றுத் திறனாளிகள்
மற்றும்
முதியோர் இருக்கைகளில்
காதில் மாட்டிக்
கைப்பேசியில் இசை
கேட்கும் இளசுகள்....

தள்ளாடும் வயதிலே
தன் குடும்ப வாழ்வுக்காய்
உழைக்க புறப்பட்ட
பெரிசுகள் நிலையாக
ஆனால்
பேருந்து மட்டும் நகரும்....

தின வாழ்க்கை வாழ்வதற்கு
காலையிலும் மாலையிலும்
கொளத்தூரும் - கோடம்பாக்கமும்
என் வீட்டுத் திண்ணைகளாகும்....
இப்படியே
நாள்தோறும் நம் பிளைப்பு
கணிணியிலும்
வழிச் செல்லும்
பாதையிலும் கழிகிறது........

இன்றைய ஈழம்

2010-05-23T20:30:00.005+05:30

நாளை என் வீட்டில்

திருடர்கள் வரலாம்...

என் வீட்டுத் தெருவில்

காவலர்கள் போகிறார்கள்...

கதறியழுகிறது கவலையில் கனமழை.....

2010-05-20T19:20:00.004+05:30

கொட்டித் தீர்த்த கனமழையில்
நனைந்தபடி நடக்கிறேன்....
வண்டியில் பொதி ஏற்றி இழுத்தபடி
விரைந்து நடக்கிறான் ஓர்
ஏழைப் பொதி வண்டி இழுப்பாளன்....

நெடுவீதியில் பிரித்துப் போட்ட
கால்வாய்கள் அப்படியே
வாய்பிளந்து கிடக்கின்றன.....
நீண்ட பெருந்தெருவின்
நிரம்பிய வெள்ளத்தில் முட்டிமோதி
மல்லுக்கட்டிய வாகனங்கள்
வழியை மறித்தபடி......

கையில் பிடித்த குடையை
"லைலா" பறித்துச் செல்கிறது ......
தெருவோரம் மழையில்
தோணி விடும் சிறுவர்கள்......

அக்கினி வெயிலை
மறைத்த மழை மேகத்துக்கு
நன்றி தெரிவித்தபடி
பேருந்துக்கு நடக்கிறேன்.....

மே மாதம் நம் வாழ்வில்
மறக்கப்படக் கூடியதல்லவே.....
வானம் கண்ணீர் மழை பொழிந்து
மீண்டும் அழுதுதீர்த்தது.........

முள்ளிவாய்க்காலில் விதைக்கப்பட்ட
எம் உறவுகளின்
ஆண்டுத் திவச விழாவில்
கறுப்புக் கொடி (குடை) பிடித்து
இன மத பேதமின்றி
அனுஸ்டிக்க வைத்த "லைலா"வே
உனக்கு ஒரு கொடி வந்தனங்கள்.......

சித்திரைத் தமிழ்மகள் சிலிர்ப்புடன் வருகிறாள்....

2010-04-13T18:39:00.004+05:30

சித்திரைத் தமிழ் மகள்
சிலிர்ப்புடன் வருகின்றாள்
நித்திரை விட்டு
விரைவினில்
எழுந்திடுவோம்...

மருத்துநீர் தலை தடவி
வெந்நீரில் குளித்திடுவோம்
நெற்றியில் நீறணிந்து
நெறிப்படி வணங்கிடுவோம்
பெரியோர் தாள் பணிந்து
கையுறை பெற்றிடுவோம்...

சில்லறை வாங்கி
உண்டியல் சேர்த்து
உறவுகள் கூடி
நிறைவுடன் மகிழ்ந்து
புத்துடை அணிய
நித்திரை விட்டு -நாம்
விரைவாக எழுவோம்....

அன்றேல்...

நித்திரையின்றி
விடியும்வரை விழித்திருப்போம்...

சித்திரைத் தமிழ்மகள்
சிலிர்ப்புடன் வருகிறாள்
வாருங்கள் நாம்
சோகங்கள் மறந்து
சுமைகளை ஒருகணம்
இறக்கி
மகிழ்ந்திருப்போம்
நிறைவாக...

வணக்கம் விடைபெறுகிறேன்....

2010-03-17T12:47:00.004+05:30

சிறு விபத்தில் சென்ற வாரம்,
எனது கையில் ஏற்பட்ட காயம் காரணமாக தட்டச்சு செய்ய முடியவில்லை.
ஆகவே சிறிது காலம் வலைத்தளத்தில் இருந்து ஒதுங்கியிருக்க வேண்டிய கட்டாயத்தில் இருக்கிறேன்.
மீண்டும் விரைவில் சந்திப்போம்.
நன்றி வணக்கம்.....................

கிரிக்கெட் பற்றிய எனது சிறிய விருப்பத் தெரிவு

2010-03-10T20:50:00.002+05:30

நண்பர் பிரபாகர் (எண்ணத்தை எழுதுகிறேன்...) கிரிக்கெட் தொடர் பதிவு ஒன்று எழுதியிருந்தார் அதைப் படித்த நேரம் முதல் நானும் ஒரு பதிவு இடலாம் என்று நினைத்தேன்..... அதன் விளைவே இது.

நம்மளுக்கெல்லாம் கிரிக்கெட் ஒத்துவராதுங்க நம்ம ரேஸ்ரே வேற.
நாங்க கால்பந்து பிரியருங்க.....

நமக்கு ரொனால்டோ, கிறிஸ்ரியான ரொனால்டோ,ரோரல்டினோ என்று ஒரு நீண்ட பட்டியல் தான் பிடிக்குமுங்க....

ஆனாலும்.......

கிரிக்கெட் பற்றிய எனது சிறிய விருப்பத் தெரிவு...
பிடிச்சிருந்தாலோ பிடிக்காவிட்டாலோ உங்கள் கருத்தைச் சொல்லுங்கள்......
விரும்பினால் நீங்களும் ஒரு கிரிக்கெட் தொடர் பதிவு போடுங்கோ.......

1.பிடித்த கிரிக்கெட் வீரர் – ஸ்டிவ்வாவ் (அவுஸ்), சச்சின் டெண்டுல்கர்(இந்), ஜாக்
காலிஸ் (தெ.ஆ)

2. பிடிக்காத கிரிக்கெட் வீரர் – ரிக்கி பாண்டிங்

3. பிடித்த வேகப் பந்து வீச்சாளர் – வாசிம் அக்ரம்(பாக்), கிளன் மெக்ராத்(அவுஸ்)

4. பிடிக்காத வேகப்பந்து வீச்சாளர் - ஸ்ரீசாந்த் (இந்)

5. பிடித்த சுழல்பந்து வீச்சாளர் - முத்தையா முரளிதரன்(இல), ஷேன்
வார்ன்(அவுஸ்), டானியல் விக்ரோரி(நியுஸ்)

6. பிடிக்காத சுழல்பந்து வீச்சாளர் - கர்பஜன் சிங்(இந்), அஜந்த மென்டிஸ்(இல)

7. பிடித்த வலதுகை துடுப்பாட்டக்காரர் - சச்சின் டெண்டுல்கர்(இந்), ஹெர்ஷல்
கிப்ஸ்(தெ.ஆ), அரவிந்த டீ சில்வா(இல)

8. பிடிக்காத வலது கை துடுப்பாட்டக்காரர் - ரிக்கி பாண்டிங்(அவுஸ்)

9. பிடித்த இடது கை துடுப்பாட்ட வீரர் - ப்ரைன் லாரா(மே.இந்), சௌரவ்
கங்குலி(இந்), சனத் ஜெயசூர்யா(இல), அடம் கில்கிரிஸ்(அவுஸ்)

10. பிடிக்காத இடது கை துடுப்பாட்ட வீரர் - கிரகாம் சிமித்(தெ.ஆ)

11. பிடித்த களத்தடுப்பாளர் - யொண்டி ரூட்ஸ்(தெ.ஆ), ஹெர்ஷல் கிப்ஸ்(தெ.ஆ),
ஏ.பி.டீ.ஈ வில்லியஸ்(தெ.ஆ), ................................

12. பிடிக்காத களத்தடுப்பாளர் - வி.வி.எஸ்.லக்ஷ்மணன்(இந்), ஆசிஷ்
நெஹ்ரா(இந்), டில்கார பெர்னாண்டோ(இல)

13. பிடித்த ஆல்ரவுண்டர் – சனத் ஜெயசூர்யா(இல), ஜாக் காலிஸ் (தெ.ஆ),

14. பிடிக்காத ஆல்ரவுண்டர் - அப்படி யாருமில்லை.

15. பிடித்த நடுவர் - டேவிட் சப்பெர்ட்(இங்லா)

16. பிடிக்காத நடுவர் - டேரல் ஹேர்(அவுஸ்)

17. பிடித்த நேர்முக வர்ணனையாளர் - அப்படி யாருமில்லை.

18. பிடிக்காத நேர்முக வர்ணனையாளர் - அப்படி யாருமில்லை.

19. பிடித்த அணி – தென் ஆப்ரிக்கா

20. பிடிக்காத அணி – அவுஸ்ரேலியா

21. விரும்பிப் பார்க்கும் அணிகளுக்கு இடையேயான போட்டிகள் – எந்த அணி
விளையாடினாலும் முதல் பத்து கடைசி பத்து ஓவர்கள் மட்டுமே விரும்பி
பார்ப்பேன்.

22. பிடிக்காத அணிகளுக்கான போட்டி – அப்படி எதுவுமில்லை.

23. பிடித்த அணித் தலைவர் - சௌரவ் கங்குலி(இந்), ஸ்டிவ்வாவ் (அவுஸ்)

24. பிடிக்காத அணித் தலைவர் - ரிக்கி பாண்டிங்(அவுஸ்)

25. பிடித்த ஆரம்பத் துடுப்பாட்ட ஜோடி – சனத் ஜெயசூர்யா- ரொமேஷ்
களுவிதாரண(இல), சச்சின் டெண்டுல்கர் - விரேந்தர் சேவாக் (இந்), அடம்
கில்க்ரிஸ் - மத்யு ஹய்டன்(அவுஸ்)

26. பிடிக்காத ஆரம்பத்துடுப்பாட்ட ஜோடி - அப்படி யாருமில்லை.

27. சிறந்த டெஸ்ட் வீரர் - ராகுல் ராவிட் (இந்), மகெல ஜெவர்தனா(இல), ஜாக்
காலிஸ் (தெ.ஆ), ப்ரைன் லாரா(மே.இந்)

28. சிறந்த ஒருநாள் போட்டி வீரர் - சச்சின் டெண்டுல்கர்(இந்)

29. பிடித்த போட்டி வகை - 20/20 மற்றும் ஒருநாள் போட்டி

30. சிறந்த கிரிக்கெட் வாழ்நாள் சாதனையாளர் – சச்சின் டெண்டுல்கர்(இந்)

பிச்சைக்காரனின் ஓட்டு

2010-03-07T14:44:00.002+05:30

நம்மூர் புகையிரத நிலையம்

நான்கு அடுக்குப் பாதைகள்
நாலா பக்கம் மக்கள் வெள்ளம்
நாற்பது பிச்சைக்காரர்
நாறுகிறது நம் நகரம்...

பொருளாதார நெருக்கடி

நேற்றைய நாள் - வேலை தேடினேன்
இன்றைய நாள் - வேலை தேடுகிறேன்
நாளைய நாள் - வேலை தேடுவேன்...

பிச்சைக்காரனின் (தேர்தல்)ஓட்டு

நேற்றுவரை
பிச்சை எடுத்தேன்
இன்று நான்
பிச்சை போடுகிறேன்...

குழந்தைகளும் வாழ்கிறார்கள்........

2010-03-06T21:49:00.004+05:30

நான்கு சுவருக்குள்
நடந்த நாடகம்
நம் வீட்டு
வரவேற்பறை வரை...

தேவதைகள் உலவுகிற தேசம்

2010-03-01T22:36:00.002+05:30

மீண்டும் கோடை
எட்டிப் பார்க்கிர்றது
எங்கள் ஊரின்
நினைவுகளைச் சுமந்தபடி
நிழற்படமாய் நான்.....

கோடை எங்கள் ஊரின்
வசந்த காலம் .....
நெல்மணிகள் புதிதெடுத்துப்
பொங்கலிட்ட பின்னாளில் சூடடிப்போம் - பின்னர்
'பொலி' பெருக்கி
வீட்டினிலே அடுக்கி வைப்போம்
மூட்டைகளில்.......

காக்கைகள் கூடு கட்ட
இடம் தேடும்....
குயில்கள் தேடிவந்து
முட்டை போடும்.....
பட்ட மரம் தேடிவந்து
மரங்கொத்தி துளைபோடும்....
கிளிகள் குஞ்சு பொரித்து அங்கு
குடும்பம் நடத்தும்......
மாரியம்மன் கோயிலிலே
திருவிழா நடக்கும்....
மான்கள் நீர் தேடி - நம்
குளக்கரைக்குப் படையெடுக்கும்....
பாம்புகள் கூடிப் பிணைந்து
மீண்டும் மீண்டும் சல்லாபிக்கும்.....
காளைகள் கொம்புக்கு
மண்ணெடுக்கும்.....
வற்றிய குளத்தில்
சிலர் வரால் பிடிப்பர்......

மா பழுக்கும்.....
புளி காய்க்கும்......
தேன் சுவையுடன்
பலாச் சுளை தித்திக்கும்.....
இளநீர் குலையுடன் இறக்கிவந்து
தாகம் தீர்ப்போம் .......
வாழைத்தோட்டம் நடுவினிலே
சோளப்பொத்தி முறித்துப் போட்டு
தீயினிலே வாட்டி ருசித்திடலாம்......

ஆற்றினிலே நெய்வாளை
அள்ளி வந்து
கூழ் ஆக்கிக் குடித்திடலாம்.....
அயிரை மீனில் நல்ல
புளிக் குழம்பு ஆக்கிடலாம்........
குடும்பமாகக் கூடி முன்போல்
இனிதே வாழ்ந்திடலாம்..........

ஆனால்......
.............
.........
....
....
...
..
.

சிதைந்துபோன என் ஊர்
மீண்டும் மீள்வதெப்போ???
திசைக்கொன்றாய் பறந்துபோன
என் உறவுகள்
மீண்டும் கூடுவது எப்போ???
இறந்து போன
என் சொந்தங்கள்
புதைக்கப்பட்ட அந்த மண்ணில் - என்
கால்கள் மீண்டும் படுமா???
???????????????
????????????
?????????
??????
????
??
?

மானம்

2010-02-27T22:39:00.001+05:30

நகரமயமாதல்

விண்ணுயர்ந்த கட்டிடங்கள்
வீதியோர கடைகளின் பின்னால்
கூனிக்குறுகித் தன்னை
மறைக்கிறது(மறைகிறது)சேரி

மானம்

கரையில் வந்து
முட்டி மோதி
தோற்றுப் போன
அலை
வெட்கத்தால்
கடலில் மூழ்கி
செத்துப்போனது…

முரண்

கூட்டிய குப்பை
ஒருபுறம்
கூட்டாத குப்பை
மறுபுறம்
எதை முதலில்
விலக்குவது?
விளக்குமாறு
கேட்கிறது
விளக்குமாறு…

சென்னையில் சில நாள்.....

2010-02-18T08:44:00.003+05:30

கூவம் ஆறும் அடையாறும்
சென்னையின் சொத்து
செத்த பிணங்கூடப்
பல நாளாகி அப்படி
நாறி நான் கண்டதில்லை…

பிச்சைக்காரர் தெருநீளம்
நிறைந்திருப்பர்….

சைக்கோவும் பைத்தியமும்
வழியோரம் படுத்துறங்கி
ஓய்வெடுப்பர்…
ஆனாலும் சிங்காரச் சென்னை
அழகானதுதான்.......

மேம்பாலங்கள் மேலே
நம் பயணம் தொடர்கிறது
அதன் கீழே பல குடும்பம்
சீவியம் நடக்கிறது....

குப்பைகளால் நிறைந்த
தெருக்கள்…

நடைபாதையெல்லாம்
மூக்கை நீட்டும் கடைகள்…

விதிகளை
மீறிய வாகனங்கள்
இவை எல்லாம்
சென்னையின் அடையாளங்கள்…

வீதிகள் தோறும்
சேரிகளின் அணிவகுப்பு
தெருவோரம் மலிந்திருக்கும்
பூக்கடைகள் …

வாய்திறந்து விரிந்திருக்கும்
கழிவுநீர் கால்வாய்கள்
ஒண்டுக்கும் ரண்டுக்கும்
வீதியெல்லாம் இலவசமாய்
விளம்பரங்கள்…

பேருந்தில் நிறைந்த கூட்டம்
பழஞ்சோற்றில் ஈயாக…

கட்சித் தலைவர்களை
தூக்கிச் சுமக்கும் மதில்கள்…

வீதிகள் எல்லாம்
பிரச்சார முழக்கம்
கட்டவுட்டும் விளம்பரமும்
கண்கொள்ளாக் காட்சி…
ஆனாலும் சிங்காரச்
சென்னை அழகானதுதான்

நானும் நிகேயும் நம் காதலும்

2010-02-14T23:48:00.006+05:30

இன்றுடன் எங்கள் காதலுக்கு பத்து வருஷம்
கல்யாணத்துக்கு நான்கு வருஷம்
ஆம் 2000ம் ஆண்டில் நாம் இருவரும் பல்கலைக்கழகத்தில்
சந்தித்து நண்பர்களானோம்.
பின்னர் நான் என் ஊருக்கும் நிகே தன் ஊருக்கும் பல்கலைக்கழகம்
முடிந்து 2004ல் சென்று விட்டோம்
2006ல் இரண்டு வீட்டிலும் கல்யாண பேச்சு எடுத்தபோது இதே பெப்ரவரி 14ல் தான் எங்கள் இருவரின் வீட்டிலும்,
எங்கள் நட்புடன் 6ஆண்டுகளாக கட்டி வளர்க்கப் பட்ட காதலைப் பற்றி சொன்னோம்.
இரு வீட்டு சம்மதத்துடன் 2006 ஜூன் ல் எங்கள் இருவருக்கும் திருமணம் நடந்தது.

என் மனைவி நிகே வேற யாருமில்லைங்க நம்ம மழைச்சாரல் http://mazhaichsaaral.blogspot.com நிகேதானுங்க.

இப்போ எங்களுக்கு ஒரு குட்டிப் பொண்ணு எண்களின் காதல் - கல்யாணப் பரிசாக இருக்கிறாள்.

காதலர் தினம்

2010-02-11T19:22:00.003+05:30

சிங்காரச் சென்னை அழகாகத் தெரிந்திட்டால்

2010-02-05T22:59:00.004+05:30

அடையாறும் கூவமும் வருநாளில்

அழகாகத் தெரிந்திட்டால்

மடை பாயும் வெள்ளமென

மக்கள் கூட்டம் நிறைந்திடுமே

பூந்தோட்டம் நாட்டிடுவர் - பின்பு

புதுப் பொலிவு பண்ணிடுவர்

காண்போரை வியக்க வைக்க

கண்காட்சி நடத்தி நிற்பர்

மூக்கைப் பிடித்து முன்னர்

வீதியிலே சென்றவர்கள்

நாக்கில் சுவையூற

வேர்க்கடலை கொறித்து நிற்பர்

நாளை வருநாளில் நல்ல

புதுச் சேதி கொண்டு வரும்

வாளை விராலுடனே நதி

நல்லழகு பெற்று விடும்

பார்க்கும் இடமெங்கும் கூவம்

புதுப் பொலிவு பெற்றுவிடில்

நோக்கும் உலகம் இந்தச்

சிங்காரச் சென்னை தனை

துளித்துளியாய்....

2010-02-01T08:03:00.005+05:30

விவசாயி தாள் வணக்கம்.

2010-01-13T23:04:00.005+05:30

எனது

வலையுலகச் சொந்தங்களே !

உங்கள் அனைவருக்கும் எனது

உழவர் திருநாளாம்

தைப் பொங்கல்

மற்றும்....

தை முதல் நாள் வாழ்த்துகள்.

தை பிறந்து விட்டது

அனைவர் வாழ்விலும்

புது வழிகள் பிறந்து

வலிகள் தீர்ந்து

இனிவரும் நாட்களில்

வளமாய் வாழ்ந்திட

வேண்டும் என்று

மனதார வாழ்த்துகிறேன்.

சேற்றில் புரண்டெழும்பி

வயல் நிலத்தில் தாளமிட்டு

உழுது நல்ல வரப்பிட்டு

நெல்லெறிந்து உரம் விதைத்து

நிலம் காத்து

சொல் பொறுக்காச் சோர்விலராய்

கண்ணுறக்கம் ஏதுமின்றி

எல்லையிலே காவலிட்டு

நெற்கதிர்கள் குனிந்து மண்ணில்

கோலமிடும் காலம் வர

பக்குவமாய் அறுத்து நல்ல

பதத்துடனே சூடடித்து

உலகமக்கள் உய்திடவே

உழைத்து நல்ல வேர்வை சிந்தி

உன்னதமாய் வாழும் எங்கள்

நன்செய் மாந்தர்தனை

நாளும் நினைத்திடுதல்

நலமன்றோ..............

தானுண்ணா வயிறு காய்ந்து

தன்நாடு செழித்திடவே

பாடுபடும் - அவ்

ஏர் பிடித்த கைகளுக்கு

பலகோடி வந்தனங்கள்.........

நாடு வளம் பெற்று

நல்மனிதர் நகரேகி

கூடு குலத்துடனே

வளம் கொழிக்க வாழ்ந்தாலும்

நாடு செழித்திடவே

"பாடு"கள் பலசுமந்து

காடு வெட்டி நல்ல

களனி செய்து

ஏர்வழியே தான் நடந்து

வேர்வையினை உரமாக்கி

நெல்மணிகள் விளைச்சலிடும்

விவசாயி தாள் வணக்கம்.

ஊன்றுகோல்

2010-01-07T18:42:00.004+05:30

சொந்த வீட்டை
பார்க்கும் ஆசையில்
முந்தி விழுந்து
முதலில் ஓடியதால்
மிதிவெடி தந்த
முதற்பரிசு..

ஹோசிமின் நினைவாக...

2010-01-02T20:54:00.005+05:30

இந்தக் கவிதை ஒரு கியூபா நாட்டுக் கவிதையின் மொழிபெயர்ப்பு. பேராசிரியர் எம்.ஏ.நுஃமான் அவர்களால் மொழிபெயர்க்கப் பட்டது. அண்மையில் படிக்க நேர்ந்தது. படித்த நேரத்திலிருந்து மனதை நெருடியபடியே இருந்தது .................................

அதை நீங்களும் படிக்க பதிவிலிடுகிறேன்.

"வேட்டை விமானம் விண்ணில் இரைந்தன

விசப்புகைக் குண்டுகள்

வீழ்ந்து வெடித்தன

எகிறிப் பறந்தன

பீரங்கிக் குண்டுகள்

சடசடத்தன மெசின் துப்பாக்கிகள்

ஓலம் ..............

அழுகை.............

கூக்குரல் ஒலிகள் .........

வயற்புறங்களிலும் வாசற்படிகளிலும்

ஓடிய இரத்தம் மறைந்து கிடந்தன குடிசைகள்.

கரும்புகை

மிக மெதுவாக விண்ணில் கலந்தது.

அடர்ந்த காட்டில் அமைதி துயின்றது.

இடைக்கிடை எங்கோ இருண்ட பகுதியில்

காட்டுப் பூச்சிகளின் கத்தல் கேட்டது.

மூங்கில் புதர்கள் மூடிய ஆற்றின்

கரையில் மெதுவாய் காற்று வீசியது.

தண்ணீர்ப் பையில் தண்ணீர்

நிரப்பிய வீரன்

நிமிர்ந்து மேலே நோக்கினான்........

மூங்கிலில் வண்ணப் பூச்சிகள் மொய்த்தன.

பத்துங்கியிருந்த படையினனை நோக்கி

முதுகுச் சுமையுடன்

அவன் முன் நடந்தான்

மரங்களின் கீழே

மடியில் வளர்த்திய

துவக்குடன்

ரொட்டியைச் சுவைத்தவாறு

வீரர்கள் இருந்தனர்....

மிக மெதுவாக

வானொலிக் கருவி

வழங்கிய மெல்லிசை

நின்றது.......

சிறிது நீண்ட மௌனம் ......................................................................

ஹனோய் வானொலி

கம்மிய குரலில்

ஒலிபரப்பியது...

"ஹோசிமின் இறந்தார்..................."

.......

........

....................

.....................................

ரொட்டித் துண்டுகள் மண்ணில் வீழ்ந்தன...

...........

........

...

நிசப்தமான மரங்களின் நிழலில்

மௌன அஞ்சலி நீண்டு வளர்ந்தது....

உன் நரம்புகளில் ஓடிய உணர்வின்

சிறுதுளி எனினும் சேர்க்க எம் குருதியில்...

"இன்னும் இன்னும் இழக்கிலோம் எங்கள்

மண்ணிலே சிறிய மணலையும் நாங்கள்...."

கொமாண்டர் அடங்கிய குரலில் கூறினான்

காட்டுப் பறவைகள் கத்திப் பறந்தன

மீண்டும் வேட்டை விமானங்கள் இரைந்தன

அடர்ந்த காட்டின் மரங்களின் அடியில்

விசைப் புகைக் குண்டுகள் வீழ்ந்து வெடித்தன......

பதுங்கி இருந்த படையினர் கரங்களில்

மெசின் துப்பாக்கிகள் வெடிக்கத் தொடங்கின

ஓங்கி வளர்ந்த உயரமான

மூங்கில் புதர்கள் மூடிய இருளில்

மீண்டும் விமானம் வீழ்ந்து நொறுங்கின......."

இனிய புத்தாண்டு நல்வாழ்த்துகள்

2009-12-31T22:29:00.006+05:30

அனைத்து உறவுகளுக்கும் இனிய புத்தாண்டு நல்வாழ்த்துகள்...

கடந்த வருட சோகங்களை மறப்போம்...

நல்லவைகளை நாளும் நினைப்போம்...

வருகின்ற புத்தாண்டை இனிதே வரவேற்று உறவுகளுடன் கூடியிருந்து மகிழ்ந்திருப்போம்...

அன்புடன்...

- தியா -

விழி ... நிமிர்...நட...

2009-12-26T23:06:00.004+05:30

"உப்பு மடச்சந்தி" 'ஹேமா' வின் இந்தப்

படத்துக்கான கவிவரிகள் இவை.

விளையாட்டுப் பொம்மையை

கைப்பிடித்த சிறு பிஞ்சே

உன் இள வயதில் ஏனம்மா

இந்தத் தலைவிரி கோலம்???

உன் கைப்பிடியின் உறுதியில்

தெரிகிறது உன் ஓர்மம்.

கண்ணே உன் உறவுகள்

எங்கேயம்மா???

ஓஓஓஓஓஓ!!!!

நீ நிற்கும் வீதியிலே

படிந்திருப்பது உன்

உறவுகளின் உதிரம் படிந்த

கறைதானோ???

அடுத்தபலி நீயாகவும் இருக்கலாம்

அதற்குமுன்

விழித்துவிடு கண்மணியே...

நிமிர்த்திவிடு குனிந்ததலை.

பாலன் பிறப்பு வாழ்த்துகள்

2009-12-24T18:30:00.001+05:30

இன்றுடன் ஏழுமாசம்...

2009-12-22T18:49:00.002+05:30

அழகான அந்தக் குருவிக்கூடு
கலைபட்டுச் சிதைந்துபோய்
இன்றுடன் ஏழுமாசம்...

பொட்டின்றிப் பூவின்றி
ஆன உடையின்றி
முகத்தில் எதுவித சலனமுமின்றி
புகமறுக்கும் உணவை
சுவை மறந்து
வலிந்து திணித்துண்டு
வயிறு வளர்த்துக் காலம் கழிகிறது...

அவள் கணவன் மறைந்து
இன்றுடன் ஏழுமாசம்
அழகிய வதனம் களையிழந்து
ஒளியிழந்து - அவள்
சிரிக்க மறந்து
கவலையில் மூழ்கித்
தனக்குள் தன்னை மறைத்தபடி
தனிமையில் கல்லாய் இறுகி
இன்றுடன் ஏழுமாசம்...

அதன்பின் முதல் முறையாக
அவள் இன்று சிரிக்கக் கண்டேன்.
இன்று பிறந்த அவள் குழந்தை
"அவன் மழலைச் சிரிப்பு
கன்னக்குழி
பெரிய முழி
அத்தனையும் அவன்
அப்பன் போலவே."
பிறர் சொல்லக் கேட்டு
மீண்டும் அவள் சிரிக்கிறாள்.

நானும் என்சிறு பெண்ணும் அச்சந்தரும் இரவுகளும்

2009-12-15T20:56:00.001+05:30

இந்தக் கவிதையை, உரையாடல் : சமூக கலை இலக்கிய அமைப்பு நடாத்தும் கவிதைப் போட்டிக்கு அனுப்பியுள்ளேன்.

ஆராரோ ஆரிவரோ
ஆரடிச்சு நீயழுதாய்
அடித்தாரை சொல்லியளு
ஆய்கினைகள் பண்ணி வைப்பேன்

காத்து நுழையாத வீட்டினுள்ளே
காவாலி அவன் நுழைந்தான்
பாத்துப்பாத்து கட்டி வைச்ச
செல்வமெல்லாம் கொண்டுபோனான்

முகமூடி கொண்டொருவன்
படியேறி வருவானென்று
அடிபாவி நான் நினைக்க
ஆதாரம் ஏதுமுண்டோ

கடிகாவல் செய்து வைக்க
காவலர்கள் யாருமில்லை
கடிநாயும் வளர்க்கவில்லை
காவலுக்கு வைக்கவில்லை

அந்தாளும் சிவனேன்னு
ஆகாயம் போயிட்டார்
இந்த உலகமதில் எங்களுக்கு
வேறு துணை யாருமில்லை

சிறுக்கி செம சிறுக்கி
சின்னமகள் இவளிருக்க
பொறுக்கி எடுத்த முத்து
வேறெதற்கு உலகினிலே

பொன்னனான பொன்மணியை
பொத்திப் பொத்தி வளர்க்கையிலே
கண்ணான கண்மணிகள்
கருவிழியும் மங்குதடி

கருவிழிகள் மங்கி மங்கி
காவல் செய்யும் வேளையிலே
இரவுதனில் எவன் வருவான்
எதையெடுப்பான் என்று பயம்

இரவு வரும் வேளையிலே
காடையர்கள் வீடு வந்தால்
இரவி வரும் வேளைக்குமுன்
பாடையெல்லோ கட்டிடுவார்

பொழுதேறிப் போகையிலே
வருவதுவோ நித துக்கம்
அழுதழுது கண்கள் மங்கும்
அனுதினமும் முகஞ்சினுங்கும்

கள்ளன் வந்தான் என்ற சேதி
வெள்ளம் போல பரவமுன்னர்
உள்ளங் கொள்ளை போனதென்று
ஊர் முழுக்க கதையுரைப்பார்

பருத்தி இலை போல நெஞ்சு
படபடக்கச் செய்யுதடி
நெருடி நெருடி நெஞ்சம்
பயத்தில் திணறுதடி

சிறு பெண்ணும் நானுமிங்கே
உறு மீனாய் தவிக்கையிலே
சிலவேளை வருநாளில்
வயசுக்கு வந்து விட்டால்

காப்பாற்ற நாதியற்று
கலங்கியெல்லோ போயிடுவேன்
பாப்பாரும் யாருமில்லை
பாவிநான் தவிக்கையிலே

கண்ணான கண்மணியே
காலந் தாழ்த்தி வயசுக்கு வா
மண் மீட்கும் காலம் வந்தால்
மகிழ்வுடன் நீ வளர்ந்திடம்மா…

ஆராரோ ஆரிவரோ
ஆரடிச்சு நீயழுதாய்
அடித்தாரை சொல்லியளு
ஆய்கினைகள் பண்ணி வைப்பேன்…

எண்மர் என் காதலர்கள்

2009-12-11T09:51:00.003+05:30

புத்தகம்

என் உழைப்பில் பாதி

கொடுத்துச் சேர்த்த சொத்து

தாலாட்டுப் பாடித்

தூங்கவைக்கும்

இன்னொரு தாய்...

மடிக்கணிணி

என் பத்து விரல்களும்

தூக்கி மகிழ்ந்து

விளையாடும்

இன்னொரு குழந்தை

இணையம்

உலகைச் சுருக்கி

என்

மடிக் கணிணிக்குள்

பூட்டிவிட்ட

விசித்திர விஸ்வரூபம்

பாதணி

மிதிபட்டுத்

தேய்ந்துபோகும்

வாய்பேசா அநாதை.

கைப்பேசி

சட்டைப் பையில்

பதுங்கியிருந்து

பணம் பறிக்கும்

இரகசிய கொள்ளைக்காரன்.

பேனா

என்றுமே என்னை

வழிநடத்தும்

வெள்ளைப்பிரம்பு.

கடிகாரம்

நேரமுகாமை கற்றுத்தந்த

நல்லாசான்..

தூக்கத்தைக் கெடுக்க

மணியடிக்கும் வில்லன்.

கண்ணாடி

என் சுக துக்கம்

மறைக்க மூக்கின்

மேல் பூட்டிய

கருப்பு ஆடை.